Profiadau myfyrwyr addysg uwch

Dylai sefydliadau addysg uwch weithio gyda’r corff o fyfyrwyr i baratoi Siarteri Myfyrwyr, sy’n nodi disgwyliadau, hawliau a chyfrifoldebau sefydliadau a’u myfyrwyr, y naill i’r llall. Dylai’r rheiny fod wedi’u cynllunio i gefnogi profiad dysgu’r myfyriwr, a chynnwys dolenni priodol i wybodaeth bellach. Cyhoeddodd Cyngor Cyllido Addysg Uwch Cymru ganllawiau ar sut y dylai darparwyr addysg uwch fynd ati i ddatblygu siarteri myfyrwyr ac mae’r disgwyliadau hyn wedi’u cynnwys yn y Fframwaith Asesu Ansawdd ar gyfer Cymru.

Cyhoeddodd CCAUC gyfarwyddyd ar arfer da o ran cyllido undebau myfyrwyr effeithiol a democrataidd, a chynrychiolaeth myfyrwyr.

Yn 2022, cyhoeddodd CCAUC adroddiad gan AU Ymlaen, a gomisiynwyd gan CCAUC, ar adolygu polisi ac arfer yn gysylltiedig â chefnogi myfyrwyr ôl-radd sy’n addysgu.

Yn 2023, cyhoeddodd CCAUC adroddiad gan Ymchwil Arad, a luniwyd ar ran CCAUC, ar brofiadau ehangach myfyrwyr ymchwil ôl-radd.

Mae’r Arolwg Cenedlaethol o Fyfyrwyr yn eiddo i Medr, y Swyddfa Fyfyrwyr, Cyngor Cyllido’r Alban, ac Adran yr Economi yng Ngogledd Iwerddon, ac fe’i rheolir gan y Swyddfa Fyfyrwyr ar ran yr holl sefydliadau hyn. Ipsos yw’r cwmni sy’n gweinyddu’r arolwg, ac mae CACI Ltd yn lledaenu’r canlyniadau i ddarparwyr a sefydliadau.

Mae rhagor o wybodaeth a data’r Arolwg Cenedlaethol o Fyfyrwyr ar gael ar wefan y Swyddfa Fyfyrwyr.

Gall pob myfyriwr israddedig blwyddyn olaf lenwi’r Arolwg Cenedlaethol o Fyfyrwyr. Gall myfyrwyr gael rhagor o wybodaeth amdano ar wefan yr Arolwg Cenedlaethol o Fyfyrwyr neu drwy ofyn i’w darparwr.

Mae’n ofynnol i’r holl ddarparwyr addysg uwch yng Nghymru sy’n cael eu rheoleiddio a’u cyllido gymryd rhan yn yr Arolwg Cenedlaethol o Fyfyrwyr a hyrwyddo’r arolwg i’r holl fyfyrwyr sy’n gymwys. Mae Medr yn ariannu cyfranogiad yn yr Arolwg Cenedlaethol o Fyfyrwyr ar gyfer darparwyr yng Nghymru.

Bydd y cwestiynau a ofynnir yn Arolwg Cenedlaethol o Fyfyrwyr 2027 yr un fath â’r rhai yn 2026. Gall darparwyr ofyn cwestiynau dewisol hefyd nad ydynt yn rhan o’r data cyhoeddus a rennir.

Er mwyn ceisio lleihau’r baich ar ddarparwyr, mae’r broses ychwanegu a dileu wedi cael ei hadolygu a’i diweddaru ar gyfer Arolwg Cenedlaethol o Fyfyrwyr 2027. Mae’r arweiniad gan y Swyddfa Fyfyrwyr a’r canllaw sefydlu ar gyfer Arolwg Cenedlaethol o Fyfyrwyr 2027 a ddarparwyd gan Ipsos yn rhoi rhagor o fanylion am y broses hon.

Mae cyfarwyddiadau ar sut i gyflenwi’r wybodaeth hon wedi’u cynnwys yng nghanllaw sefydlu Arolwg Cenedlaethol o Fyfyrwyr 2027, a roddir i gysylltiadau darparwyr gan Ipsos. Mae’r canllawiau hefyd ar gael ar allrwyd Arolwg Cenedlaethol o Fyfyrwyr Ipsos ac maen nhw’n cynnwys gwybodaeth am weinyddu’r arolwg, cyfrifoldebau allweddol a dyddiadau.

• Trefniadau a chamau gweithredu darparwyr ar gyfer arolwg cenedlaethol o fyfyrwyr 2027
• Canllawiau’r Swyddfa Fyfyrwyr ar Arolwg Cenedlaethol o Fyfyrwyr 2027 – ar gyfer darparwyr addysg uwch a cholegau addysg bellach yng Nghymru sy’n dychwelyd data am fyfyrwyr i’r Asiantaeth Ystadegau Addysg Uwch (HESA)
• Canllaw Arfer Da 2027

Mae Darganfod Prifysgol yn eiddo i Medr, y Swyddfa Fyfyrwyr, Cyngor Cyllido’r Alban ac Adran yr Economi yng Ngogledd Iwerddon. Y Swyddfa Fyfyrwyr sy’n rheoli ochr weinyddol y wefan.

Mae Darganfod Prifysgol yn wefan y gall darpar fyfyrwyr ei defnyddio i gymharu cyrsiau gradd ar draws y DU. Mae’n amlygu data am y darparydd a’r cwrs gan gynnwys canlyniadau’r NSS a Deilliannau Graddedigion.

Mae’n ofynnol i bob darparydd addysg uwch yng Nghymru uwchlwytho data i Darganfod Prifysgol. Ar gyfer Coleg, gall peth o’r data hyn gael eu huwchlwytho gan Brifysgol, yn dibynnu ar drefniadau breinio.

Mae HESA wedi cyhoeddi’r amserlen ar gyfer cofnod Darganfod Prifysgol 2026/27. Os oes problemau wrth fodloni unrhyw derfynau amser, cysylltwch â [email protected].