Ansawdd a gwelliant parhaus

Fframwaith Ansawdd

Mae Medr wedi datblygu Fframwaith Ansawdd sy’n cynnwys gwybodaeth am y canlynol:

• sut y bydd Medr yn asesu ansawdd ym mhob rhan o’r sector addysg drydyddol
• rolau darparwyr
• sut y caiff safbwyntiau dysgwyr eu hystyried, a
• datblygiad proffesiynol staff.

Rydym yn gweithio gydag Estyn a QAA i gysoni dulliau lle bo modd. Byddwn hefyd yn parhau i gydweithio â rhanddeiliaid i ddatblygu methodolegau asesu ansawdd allanol.

Nod y Fframwaith Ansawdd yw helpu darparwyr i sicrhau bod dysgwyr yn cael darpariaeth o’r ansawdd gorau mewn sector sy’n ymdrechu i wella’n barhaus.

Credwn mai ystyr addysg o ansawdd da yw addysg sy’n diwallu anghenion rhesymol dysgwyr. Caiff hyn ei ddangos drwy ddeilliannau cadarnhaol i ddysgwyr, yng nghyd-destun amrywiaeth y sector a’r corff dysgwyr.

Data

Byddwn yn ystyried data er mwyn canfod unrhyw risgiau i ansawdd addysg drydyddol, gan ddefnyddio data sydd eisoes ar gael lle bynnag y bo modd. Bydd hyn yn cynnwys data o’r Casgliad Data Ôl-16, Cofnod Dysgu Gydol Oes Cymru a HESA.

Mae’n bosibl y bydd hyn hefyd yn cynnwys data o archwiliadau mewnol ac allanol a gomisiynir gan ddarparwyr, ynghyd ag archwiliadau a gomisiynir gan Medr.

Mae’r data y byddwn yn eu hystyried yn cynnwys y canlynol, ond nid ydynt yn gyfyngedig iddynt:

(a) recriwtio
(b) cynnydd
(c) cadw
(d) cwblhau (gan gynnwys ennill cymwysterau)
(e) cwynion i Medr (gan gynnwys niferoedd a phatrymau)
(f) arolygon dysgwyr
(g) cyrchfannau (cyflogaeth/addysg/hyfforddiant)

Rydym yn bwriadu ymgynghori ar ddangosyddion perfformiad i lywio’r ffordd y byddwn yn ymdrin â data.

Mesurau perfformiad ôl-16 cyson ar gyfer addysg bellach a’r chweched dosbarth

Caiff cyfraddau cwblhau a chyrhaeddiad dysgwyr sy’n astudio mewn sefydliadau addysg bellach a’r chweched dosbarth mewn ysgolion eu cyhoeddi’n flynyddol.

Mae’r mesurau perfformiad cyson yn dangos cyfran y dysgwyr sy’n ennill y cymwysterau y maen nhw’n anelu atynt, fel cyfran o’r rhai sy’n dechrau rhaglen astudio.

Mae ystadegau cenedlaethol ar gyfer cyrhaeddiad dysgwyr ar gael ar wefan Llywodraeth Cymru.

Mesurau perfformiad ôl-16 cyson: trosolwg

Adroddiadau ar ddeilliannau dysgwyr ar gyfer darparwyr ôl-16

Mae Llywodraeth Cymru wedi cyhoeddi dau adroddiad sy’n mesur llwyddiant y canlynol:

• darparwyr dysgu seiliedig ar waith
• partneriaethau dysgu oedolion yn y gymuned

Mae’r adroddiadau’n cynnwys gwybodaeth am:

• ganran yr holl gymwysterau a enillwyd gan ddysgwyr dros y 3 blynedd diwethaf
• y gyfradd gyfartalog a enillwyd ar draws yr holl ddarparwyr tebyg yng Nghymru

Mesurau canlyniadau dysgwyr ar gyfer addysg bellach, dysgu seiliedig ar waith a dysgu oedolion yn y gymuned Bagloriaeth Sgiliau Cymru Uwch: cofnodi a mesur deilliannau Ystadegau Myfyrwyr Addysg Uwch: Y DU

Canlyniadau asesiadau ansawdd allanol

Bydd Medr yn gweithio gyda darparwyr a chyrff sy’n cynnal asesiadau ansawdd allanol er mwyn sicrhau bod gweithdrefnau asesu’n gadarn, yn gymesur ac yn amserol; yn cynnig gwerth ychwanegol i ddarparwyr; ac yn cael effaith o ran ysgogi gwelliant. Yn achos chweched dosbarth ysgolion, rydym yn disgwyl i awdurdodau lleol weithio gyda’u hysgolion i sicrhau y caiff hyn ei wneud.

Byddwn yn defnyddio canlyniadau arolygiadau Estyn ac adolygiadau QAA wrth asesu ansawdd darpariaeth. Ceir hyd i adroddiadau o arolygiadau Estyn a adolygiadau’r QAA ar wefannau’r cyrff hynny. Os bydd unrhyw ddarparwr yn cael canlyniad sy’n golygu bod angen ymgysylltu pellach, ystyrir nad yw’n dangos ansawdd da. Byddwn yn monitro’r ffordd y bydd darparwyr yn ymgysylltu ag Estyn a QAA er mwyn sicrhau eu bod yn llwyddo i fynd i’r afael â materion a nodir. Os na allant fynd i’r afael â’r materion, mae’n bosibl y byddwn yn rhoi ein Datganiad Ymyrraeth ar waith.

Fframwaith Asesu Ansawdd ar gyfer darparwyr addysg uwch

Yn rhan o’r Fframwaith Asesu Ansawdd i Gymru, mae’n rhaid i sefydliadau a reoleiddir dderbyn adolygiadau sicrhau ansawdd allanol rheolaidd. Cynhelir yr adolygiadau hyn drwy ddefnyddio’r Adolygiad Gwella Ansawdd a ddatblygwyd gan yr Asiantaeth Sicrhau Ansawdd ar gyfer Addysg Uwch.

Gweithdrefnau ar gyfer asesu ansawdd addysg uwch

Mae’r cylchlythyr hwn yn amlinellu ein gweithdrefnau ar gyfer asesu ansawdd addysg, a etifeddwyd gan Gyngor Cyllido Addysg Uwch Cymru.

Gweithdrefnau ar gyfer asesu ansawdd addysg (cylchlythyr CCAUC W19/05HE)

Goruchwylio addysg

Mae’r Swyddfa Gartref yn pennu canllawiau ar y gofynion ar gyfer darparwyr addysg sy’n dymuno gwneud cais am drwydded i noddi myfyrwyr rhyngwladol i ddod i’r DU, ac i gadw’r drwydded honno. Rhaid i ddarparwyr addysg sy’n dymuno dod yn noddwyr ddangos bod eu holl safleoedd yn bodloni safonau addysgol derbyniol o ran ansawdd, cynaliadwyedd ariannol, rheolaeth a llywodraethu. Byddant yn gwneud hyn drwy eu corff Goruchwylio Addysgol. Medr yw’r corff Goruchwylio Addysg ar gyfer prifysgolion cofrestredig yng Nghymru, a darparwyr addysg uwch yng Nghymru â chyrsiau penodol nad ydynt yn derbyn goruchwyliaeth addysg gan Estyn na chorff goruchwylio arall. Estyn yw’r corff goruchwylio addysg ar gyfer y rhan fwyaf o ddarpariaeth arall o fewn cylch gwaith Medr.