Sta/Medr/07/2025: Mesurau deilliannau dysgwyr ar gyfer prentisiaethau, Awst 2023 i Orffennaf 2024

Nodyn:

Mae’r datganiad hwn wedi’i ddiweddaru ag ystadegau awdurdodau lleol ar gyfer dysgu oedolion yn y gymuned. Cafodd y rhain eu hepgor yn y gorffennol oherwydd problemau’n gysylltiedig ag ansawdd data.

Roedd un awdurdod lleol wedi bod yn cyflwyno data dysgu i Gofnod Dysgu Gydol Oes Cymru (LLWR) na ddylid bod wedi’u cynnwys. Mae’r awdurdod lleol wedi mynd ati i ganfod y data cywir ar gyfer blwyddyn academaidd 2023/24 ac rydym wedi dileu’r data anghywir o’n hystadegau. Datgelodd yr ymchwiliad fod y problemau ansawdd data hyn hefyd yn bodoli mewn blynyddoedd blaenorol, ond nid yw’r blynyddoedd hyn wedi cael eu cywiro. Gellir cymharu ystadegau cenedlaethol dysgu oedolion â blynyddoedd blaenorol, ond dylid cofio effaith y broblem yn gysylltiedig ag ansawdd data.

Gweler yr wybodaeth am Ansawdd a methodoleg am fanylion.

Prif bwyntiau

• Cynyddodd y gyfradd cwblhau ar gyfer gweithgareddau dysgu oedolion o 94% yn 2022/23 i 95% yn 2023/24.
• Cynyddodd y gyfradd llwyddo ar gyfer gweithgareddau dysgu oedolion asesadwy o 84% yn 2022/23 i 87% yn 2023/24.
• Cynyddodd cyfradd llwyddo prentisiaethau yn 2023/24 i 74%. Mae’n dal yn is na’r gyfradd cyn pandemig Covid-19.
• Prentisiaethau lefel sylfaen a ddangosodd yr adferiad cryfaf yn 2023/24.
• Mae’r gyfradd llwyddo ar gyfer prentisiaethau uwch yn llawer is nag ar gyfer lefelau eraill, a dyna’r gyfradd lle gwelwyd yr adferiad lleiaf ers y pandemig.
• Ni wnaeth prentisiaid uwch ond pasio ychydig dros hanner y gweithgareddau sgiliau hanfodol cymhwyso rhif a gwblhawyd ganddynt.
• Bu cynnydd yn y gyfradd llwyddo gyffredinol yn y sectorau mwy canlynol:
  • Gofal Iechyd a Gwasanaethau Cyhoeddus;
  • Peirianneg;
  • Lletygarwch.
• Ymhlith y sectorau mwy, gostyngodd y gyfradd llwyddo mewn:
  • Adeiladu;
  • Rheolaeth a Phroffesiynol.
• Mae’r bwlch yn y gyfradd llwyddo rhwng dysgwyr yn yr ardaloedd mwyaf a lleiaf amddifadus yn cau.
• Bu cynnydd mawr yng nghyfradd llwyddo dysgwyr ar draws cefndiroedd lleiafrifol ethnig.
• Cafwyd cyfradd llwyddo uwch na’r cyffredin mewn gweithgareddau prentisiaeth a gwblhawyd yn gyfan gwbl yn Gymraeg.

Cyfradd llwyddo dysgu oedolion yn ôl blwyddyn academaidd

Ffigur 1: Awst 2013 i Orffennaf 2024

Disgrifiad: Mae cyfradd llwyddo dysgu oedolion yn parhau i wella ers y pandemig, ond mae bwlch yn dal i fodoli rhwng y gyfradd llwyddo bresennol a’r gyfradd llwyddo cyn y pandemig.

Data ar StatsCymru