Cynllun Strategol drafft 2025-2030

Sefydlu Medr fel sefydliad hynod effeithiol, uchel ei barch ac fel rheoleiddiwr yr ymddiriedir ynddo, gan lunio uchelgeisiau’r dyfodol ar gyfer y sector addysg drydyddol yng Nghymru trwy gydweithio.

Ffurfiwyd Medr ar 1 Awst 2024, gan uno timau o sefydliadau etifeddol, y maent i gyd yn dod ag arbenigedd a phrofiad yn eu maes eu hunain. Mae meithrin capasiti, datblygu tîm cydlynol ac effeithiol a chreu diwylliant sy’n meithrin ein gwerthoedd ac yn ysbrydoli ymddygiadau cadarnhaol yn hanfodol i sefydlu ein hegwyddorion gweithredu a dangos y ffordd y byddwn yn gweithio.

Gan hyrwyddo amrywiaeth a chynhwysiant, byddwn yn dod yn gyflogwr o ddewis, gan gefnogi datblygiad a llesiant ein pobl, a chan hybu creadigrwydd ac arloesi mewn amgylchedd gweithio deinamig a chynaliadwy. Byddwn yn sefydlu perthnasoedd â darparwyr a phartneriaid eraill sy’n seiliedig ar ymddiriedaeth a thryloywder ar y ddwy ochr ac, yn ysbryd partneriaeth gymdeithasol, byddwn yn cydweithio gyda phartneriaid i gyflawni canlyniadau.

Gwyddom fod gan sefydliadau cryf drefniadau llywodraethu cryf ac rydym yn deall ein cyfrifoldebau fel rheoleiddiwr i sicrhau mai felly y mae hi. Byddwn yn sefydlu system gofrestru ar gyfer addysg uwch erbyn 1 Awst 2026. Ar gyfer darparwyr eraill yn y sector addysg drydyddol, telerau ac amodau cyllido fydd y cyfrwng y byddwn yn ei ddefnyddio i arfer ein pwerau rheoleiddio. Bydd ein system reoleiddio, a fydd yn tanategu ein holl nodau strategol, yn cynnwys amodau mewn perthynas â llywodraethu a rheoli; ansawdd a pherfformiad; ymgysylltu â dysgwyr a’u hamddiffyn; lles staff a myfyrwyr; cyfle cyfartal; y Gymraeg; a chynaliadwyedd ariannol.

Rydym yn cydnabod y cyfleoedd y mae Medr yn eu darparu, trwy oruchwyliaeth ar y sector addysg drydyddol, ac mae ein gwaith eisoes wedi dechrau. Rydym yn ymrwymedig i arwain newid sy’n cael effaith fawr, ac o’r dechrau un byddwn yn ceisio gwella deilliannau a phrofiadau dysgwyr. Ni fyddwn yn osgoi trafodaeth agored a gonest, gan wybod bod newid yn ofynnol i wireddu manteision i unigolion, ein cymunedau, ein heconomi a chymdeithas.

Ymrwymiadau sefydlu

Byddwn yn datblygu system reoleiddio gymesur, ar sail risg, i gyrraedd ein nodau strategol erbyn 1 Awst 2026, a honno’n cael ei thanategu gan gofrestr addysg uwch a thelerau ac amodau cyllido ar gyfer rhannau eraill o’r sector addysg drydyddol, gan barchu ymreolaeth sefydliadol, rhyddid academaidd a chenadaethau unigryw darparwyr addysg drydyddol yng Nghymru.

Byddwn yn diwygio ein cynllun cydraddoldeb strategol i fod yn gyson â’n strategaeth pobl a diwylliant, i sicrhau bod tegwch, amrywiaeth a chynhwysiant yn cael eu gwreiddio ar draws Medr.

Byddwn yn diffinio ein safle yn nhirwedd addysgol, economaidd a chymdeithasol Cymru, gan sefydlu data a gwybodaeth sylfaenol i greu dadansoddiad cadarn o berfformiad cyfredol a blaenoriaethau ar gyfer gwella. Byddwn yn ymgysylltu â phartneriaid i adnabod cyfleoedd a heriau ar draws y sector addysg drydyddol.

Ymrwymiadau twf

Byddwn yn ymgynghori ynghylch system gyllido i gefnogi anghenion pob rhan o’r sector addysg drydyddol. Bydd hon yn hybu llwybrau dysgu eglur, pontio rhwydd, dysgu hyblyg, darpariaeth gynhwysfawr a safonau rhagorol o ran deilliannau dysgwyr i ddiwallu anghenion cyffredinol sector addysg drydyddol gydlynol o ansawdd da.

Ar sail risg, byddwn yn monitro’r modd y cydymffurfir â’r system reoleiddio, gan ddisgwyl i ddarparwyr yn y lle cyntaf gymryd cyfrifoldeb am eu perfformiad a’u strategaethau gwella eu hunain, a byddwn yn cymryd camau cymesur i ymyrryd lle canfyddir achos o ddiffyg cydymffurfio.

Byddwn yn adolygu’r ffordd yr ydym yn casglu data a gwybodaeth gan ddarparwyr ac yn datblygu cynlluniau i wella systemau a phrosesau casglu data sy’n lleihau biwrocratiaeth a llwyth gwaith i’r eithaf. Byddwn yn cynnal gwerthusiad cynhwysfawr o bob rhan o’r sector addysg drydyddol a’r sefyllfa ar y cyfan yng Nghymru i ddarparu sylfaen dystiolaeth gref ar gyfer ein prosesau cynllunio a phenderfynu ni ein hunain ac i ddylanwadu ar bolisi’r Llywodraeth.

Byddwn yn adolygu sut y gellir defnyddio systemau gwybodaeth data i werthuso sut y mae’r ddarpariaeth drydyddol yn cyd-fynd ag anghenion economaidd a chymdeithasol Cymru. Bydd hyn yn cynnwys craffu ar ddeilliannau dysgwyr ac adnabod anghydraddoldebau i oleuo gwelliant a bydd yn darparu’r gallu i ddwyn cymariaethau ar lefel genedlaethol a rhyngwladol. Bydd gennym ragdybiaeth o blaid tryloywder, gan gyhoeddi data ar berfformiad ar lefel y system a darparwyr.

Sicrhau bod y sector addysg drydyddol yn canolbwyntio ar anghenion dysgwyr – eu profiad, eu cyflawniad a’u llesiant, gan sicrhau eu bod yn cael eu cynnwys mewn prosesau penderfynu, a hybu cyfranogiad mewn dysgu ar bob adeg mewn bywyd.

Bydd Medr a’r darparwyr a gyllidir gennym yn gwneud llais ac anghenion ein dysgwyr yn gwbl ganolog i’n prosesau penderfynu, gan gynnwys dysgwyr mewn modd ystyrlon yn y broses o lunio eu haddysg, eu hyfforddiant a’u profiadau dysgu. Mae disgwyliadau dysgwyr yn newid, a rhaid i’r sector ei roi ei hun mewn sefyllfa i ymateb i’r disgwyliadau hynny.

Byddwn yn creu’r amodau sy’n galluogi dysgwyr i ddatblygu, fel y gallant gyflawni’r deilliant sy’n iawn iddynt hwy. Byddwn yn darparu cyfleoedd sy’n cydnabod amrywiaeth ein dysgwyr ac rydym yn ymrwymedig i ddileu rhwystrau i ddysgu. Bydd ein darparwyr yn ymgysylltu â rhieni a gwarcheidwaid i gefnogi dysgwyr, yn enwedig lle mae anghenion dysgu ychwanegol wedi cael eu hadnabod ar gyfer ein dysgwyr iau. Byddwn yn gweithio gyda phartneriaid i hybu llesiant, annog ein dysgwyr i fod â dyheadau mwy uchelgeisiol, ac yn cefnogi proses bontio lwyddiannus i mewn i fyd gwaith neu ddatblygiad llwyddiannus ym myd gwaith.

Mae dysgu gydol oes yn rheidrwydd mewn economi a chymdeithas sy’n newid yn gyflym. Ni all dysgu fod yn gyfyngedig mwyach i amser a dreulir mewn addysg orfodol – dylai dysgu gael ei gofleidio ar bob adeg mewn bywyd. Mae manteision dysgu gydol oes yn dra hysbys ac yn mynd y tu hwnt i fantais economaidd, gyda dysgu’n cael effaith gadarnhaol ar iechyd a llesiant unigolion a chymdeithas. Beth bynnag fo’r lefel dysgu neu’r math o ddysgu, boed yn ddysgu am y tro cyntaf, yn uwchsgilio, yn ailsgilio neu’n ymgymryd â dysgu anffurfiol mewn cymunedau, mae pob gweithgarwch dysgu’n cael effaith. Mae dyletswydd arnom i hybu cyfranogiad, a byddwn yn ceisio darparu seilwaith sy’n cynorthwyo dysgwyr i fynd ati i ddysgu ar unrhyw adeg yn eu bywydau, gan eu galluogi i ddod yn ddinasyddion gweithredol ac ymgysylltiol.

Ymrwymiadau sefydlu

Byddwn yn sefydlu cod ymgysylltu â dysgwyr a chanllawiau ynghylch cynlluniau amddiffyn dysgwyr fel rhan o’n fframwaith rheoleiddio erbyn 1 Awst 2026, gan gefnogi’r amrywiaeth o ddysgwyr fel eu bod i gyd yn cael cyfleoedd priodol i gael eu cynnwys a’u cynrychioli.

Byddwn yn datblygu fframwaith cyffredin ar gyfer iechyd meddwl a llesiant erbyn 1 Awst 2026, a fydd yn cadarnhau cyfle cyfartal ac yn cael ei gryfhau gan amodau rheoleiddiol i gefnogi lles staff a dysgwyr.

Byddwn yn nodi amodau rheoleiddiol i hybu cyfle cyfartal i gynyddu cyfranogiad, cefnogi cyfraddau cadw, lleihau bylchau mewn cyrhaeddiad a chefnogi deilliannau da i ddysgwyr o grwpiau heb gynrychiolaeth ddigonol, ni waeth pa rwystrau economaidd, diwylliannol, cymdeithasol a sefydliadol allent eu hwynebu.

Byddwn yn creu fforwm llais dysgwyr erbyn 1 Awst 2026 ac yn ceisio deall sut y gall yr amgylchedd y byddwn yn ei greu, gyda’i systemau ategol, ddylanwadu ar ddysgwyr i gyfranogi ac aros mewn addysg a hyfforddiant.

Ymrwymiadau twf

Byddwn yn ceisio sicrhau addysg ddiogel a chynhwysol o fewn y sector addysg drydyddol, gan ddefnyddio’r holl bwerau sydd ar gael. Byddwn yn ei gwneud yn ofynnol i ddarparwyr wneud ymrwymiadau i sicrhau bod gan ddysgwyr lwybrau hygyrch, effeithiol i geisio iawn am unrhyw broblem a allai godi.

Byddwn yn gweithio gyda dysgwyr a darparwyr i ddeall sut orau i sicrhau ymgysylltiad gweithredol â’u dysgu eu hunain gan ddysgwyr, gan wneud y gorau o’r holl gyfleoedd sydd ganddynt i wireddu eu potensial eu hunain.

Byddwn yn datblygu system sy’n annog yr holl ddysgwyr i ddod yn ddinasyddion ymgysylltiol, sy’n weithgar yn eu cymuned, ac yn hybu cyfleoedd i gyfranogi mewn rhaglenni symudedd allanol. Byddwn yn ceisio sicrhau bod dysgwyr a darparwyr yn rhannu’r hyn y maent wedi’i ddysgu – yn enwedig o’u gwaith ymchwil ac arloesi – gyda’u cymuned ac economi ehangach, ac yn gweithio gyda darparwyr i benderfynu sut orau y gellir mesur yr effaith.

Byddwn yn gweithio gyda phartneriaid i hyrwyddo manteision dysgu trwy gydol bywyd ac yn pennu targedau i gynyddu cyfranogiad. Byddwn yn hybu mynediad gan grwpiau sy’n draddodiadol heb gynrychiolaeth ddigonol mewn addysg drydyddol, yn enwedig y rhai a allai fod yn wynebu rhwystrau cymdeithasol, diwylliannol, economaidd neu sefydliadol i addysg.

Byddwn yn gweithio gyda phartneriaid i ddatblygu ffyrdd o annog dysgwyr cyn-16 i bontio’n esmwyth i addysg ôl-orfodol. Gan weithio gyda Llywodraeth Cymru a phartneriaid eraill, byddwn yn datblygu system sy’n cefnogi gostyngiad yn niferoedd y bobl nad ydynt mewn addysg, cyflogaeth, na hyfforddiant, gan bennu targedau sy’n gweithio tuag at y Cerrig Milltir Cenedlaethol a bennwyd gan Lywodraeth Cymru.

Creu system addysg a hyfforddiant gydlynol lle gall pawb gaffael y sgiliau a’r wybodaeth y mae eu hangen arnynt i gael effaith go iawn ar economi a chymdeithas sy’n newid.

Mae gan addysg, hyfforddiant, ymchwil ac arloesi rôl ganolog o ran cyfrannu at ddatblygu economi gynaliadwy ac arloesol yng Nghymru. Globaleiddio, technoleg, awtomeiddio, deallusrwydd artiffisial, newid hinsawdd – rhaid i ddatblygiad gwybodaeth a sgiliau aros gyfuwch ag anghenion byd sy’n newid yn gyflym. Byddwn yn gweithio gyda chyflogwyr ac yn gwrando arnynt i ddeall y ddarpariaeth y mae ei hangen arnynt ar gyfer eu gweithlu ac yn datblygu system sy’n symleiddio mynediad at uwchsgilio neu ailsgilio i ateb y galw. Mae arnom eisiau cynorthwyo ein darparwyr i wneud defnydd effeithiol o dechnolegau sy’n newid, fel bod dysgwyr wedi’u harfogi ar gyfer diwydiannau a ffyrdd o weithio sy’n newid.

Gall galluoedd ymchwil y sector addysg drydyddol fod o gymorth i ddarparu gwybodaeth ar gyfer ein gofynion addysg a hyfforddiant, er mwyn i ni allu deall yn well beth fydd yr anghenion o ran sgiliau yn y dyfodol. Bydd ymwybyddiaeth o ymchwil ac arloesi’n cael ei hybu, bydd canlyniadau ymchwil yn cael eu rhannu, a bydd gwybodaeth yn cael ei rhoi ar waith yn ymarferol i’n galluogi i gefnogi economi gynaliadwy.

Bydd ein dyhead am gymdeithas fywiog a chynaliadwy’n cael ei wireddu trwy unigolion ymgysylltiol sy’n fodlon chwarae rhan bwysig yn natblygiad eu cymunedau. Bydd ein darparwyr yn annog dysgwyr a byddant hwy eu hunain yn hyrwyddo eu dysgu a’u hymchwil. Mae arnom eisiau i’r sector addysg drydyddol gael ei gydnabod fel partneriaid creadigol ac arloesol yn y broses o ddatblygu eu cymuned.

Bydd Medr yn gweithio gyda phartneriaid i ddarparu amgylchedd sy’n annog yr holl oedolion yng Nghymru i ddatblygu’r sgiliau a’r wybodaeth y mae eu hangen arnynt ar unrhyw adeg yn eu bywydau, i fyw bywyd boddhaus a chael effaith ar eu cymdeithas a’r economi. Bydd hyn yn galw am ddigon o adnoddau i ysgogi a chynnal y galw.

Mae’r amgylchedd dysgu’n gymhleth, a gwyddom nad yw llwybrau dysgu wastad yn eglur i ddysgwyr – boed ar ddechrau eu taith ddysgu, neu wrth iddynt gamu ymlaen drwyddi. Mae darparwyr wedi dweud wrthym bod arnom angen mwy o gydlyniad yn y sector addysg drydyddol, a byddwn yn rhoi anogaeth i gydweithio, gan werthfawrogi pob rhan o’r sector am ei chryfderau penodol, gan gofleidio amrywiaeth ymhlith cenadaethau. Bydd hyn yn arwain at lwybrau dysgu mwy cydlynol, yn ei gwneud yn rhwydd pontio o fewn y sector, yn darparu cyfleoedd ar gyfer dysgu hyblyg, ac yn hybu dysgu trwy gydol bywyd.

Ymrwymiadau sefydlu

Byddwn yn datblygu cysylltiadau cryf â busnesau, diwydiant, Partneriaethau Sgiliau Rhanbarthol a darparwyr i adnabod gofynion o ran sgiliau yn y dyfodol. Gan weithio gyda Cymwysterau Cymru a phartneriaid eraill, byddwn yn defnyddio’r wybodaeth hon i ddylanwadu ar y system sgiliau yng Nghymru, gan sicrhau datblygiad parhaus y cwricwlwm a phrofiad gwaith i baratoi dysgwyr i lwyddo. Gan weithio gyda darparwyr, byddwn yn hybu dull effeithiol o ddefnyddio cyllid i ddiwallu’r anghenion o ran sgiliau yn y dyfodol.

Gan weithio mewn partneriaeth gyda Llywodraeth Cymru ac eraill, byddwn yn diffinio sut y dylai darpariaeth brentisiaethau Cymru edrych i ddiwallu anghenion dysgwyr a’r economi yng Nghymru, yn hybu ymgysylltiad cryf â chyflogwyr, ac yn sicrhau safonau cymhwysedd galwedigaethol cadarn.

Byddwn yn dadansoddi gwahanol ffyrdd o gymhwyso cenhadaeth ddinesig ac ymgysylltu o fewn y sector addysg drydyddol, gan ganolbwyntio i ddechrau ar addysg uwch a phellach. Byddwn yn creu amodau sy’n annog dysgwyr i fod yn aelodau gwerthfawr o’u cymunedau lleol ac yn ddinasyddion ymgysylltiol, sy’n annog darparwyr i rannu eu dysgu, ac yn gweithio gyda darparwyr i benderfynu sut orau y gellir mesur yr effaith.

Ymrwymiadau twf

Byddwn yn datblygu amgylchedd addysg drydyddol sy’n galluogi dysgwyr i ddysgu trwy gydol eu bywydau, gan ysgogi dulliau hyblyg lle mae amser, lle a chymorth ar gyfer dysgu yn y cwestiwn.

Byddwn yn meithrin cydweithio rhwng darparwyr i greu llwybrau dysgu sy’n eglur, yn gydlynol ac yn hawdd dod o hyd i’r ffordd, sy’n hwyluso pontio rhwydd, sy’n cefnogi cyfle cyfartal a, gan weithio gyda chyflogwyr, byddwn yn sicrhau ein bod yn cefnogi llwybrau a fydd yn cyfrannu at economi gynaliadwy ac arloesol yng Nghymru.

Byddwn yn adolygu hyblygrwydd addysg oedolion yng nghyd-destun dysgu gydol oes a mwy o gyfranogiad, ac yn ystyried sut y dylai darpariaeth sgiliau sylfaenol gael ei chyflwyno i wella gweithgarwch caffael sgiliau ar draws y boblogaeth oedolion.

Byddwn yn cefnogi darpariaeth gwricwlaidd o ansawdd rhagorol i ateb y galw economaidd a chymdeithasol. Byddwn yn gweithio gyda chyflogwyr, partneriaid a darparwyr i hybu cyngor ac arweiniad gyrfaoedd o ansawdd da, gan godi dyheadau ar gyfer dysgu pellach ac ar gyfer datblygiad gyrfa mewn cyflogaeth sy’n gynhyrchiol, sydd â chyflog da ac sy’n foddhaus neu ddysgu pellach.

Sicrhau bod addysg drydyddol yn amcanu at safonau rhagorol, darpariaeth o ansawdd ac yn codi disgwyliadau addysgol er mwyn i ddysgwyr wireddu eu huchelgeisiau.

Mae Medr yn ymrwymedig i welliant parhaus safonau academaidd a galwedigaethol ac ansawdd y ddarpariaeth a bydd yn creu amgylchedd ac amodau ar gyfer pennu a chyrraedd safonau rhagorol o ran deilliannau dysgwyr. Byddwn yn monitro safonau cyflawniad, llwyddiant a phrofiad dysgwyr drwy’r sector cyfan a byddwn yn defnyddio ein pwerau rheoleiddio i ysgogi gwelliant parhaus.

Rydym yn cydnabod yr effaith y mae Covid-19 wedi’i chael ar addysg a hyfforddiant, ac ar ddeilliannau dysgwyr. Gwyddom, er y bu gwelliant mewn rhai meysydd, bod rhagor i’w wneud o hyd, yn syml i ddychwelyd at y safon deilliannau a gyflawnid cyn pandemig Covid-19. Mae angen i ni gyflymu’r adferiad mewn deilliannau a byddwn yn gweithio gyda darparwyr i bennu targedau uchelgeisiol ar gyfer deilliannau dysgwyr.

Byddwn yn cynorthwyo’r gweithlu addysg drydyddol i gael mynediad at ddysgu proffesiynol effeithiol, gan archwilio ffyrdd o rannu arfer gorau ac estyn addysgeg effeithiol ar draws y sector cyfan. Gan osgoi biwrocratiaeth ac ystyried llwyth gwaith yn ein ffyrdd o weithio, byddwn yn sicrhau bod y gweithlu’n gallu canolbwyntio ar ddiwallu anghenion dysgwyr a gwella deilliannau.

Byddwn yn datblygu systemau sy’n ein galluogi i holi data a gwybodaeth i ategu dulliau seiliedig-ar-dystiolaeth er mwyn ysgogi gwelliant parhaus. I gyflawni hyn, bydd angen i ni gymharu data mewn modd ystyrlon a deall sut y mae pob rhan o’r sector yn cyfrannu at gyrraedd ein nodau strategol ni a rhai Llywodraeth Cymru. Byddwn yn ceisio rhoi Cymru ar flaen y gad ym maes addysg drydyddol, hyfforddiant, ymchwil ac arloesi, gan sefydlu enw da’n rhyngwladol am ragoriaeth yn ansawdd y ddarpariaeth, profiad dysgwyr, a deilliannau dysgwyr sy’n diwallu anghenion economaidd, cymdeithasol, amgylcheddol a diwylliannol.

Ymrwymiadau sefydlu

Byddwn yn rhoi fframwaith ansawdd ar waith fel rhan o’n trefniadau rheoleiddio, erbyn 1 Awst 2026, a fydd yn cynnwys ffocws ar berfformiad sy’n ymwneud â phrofiad a deilliannau dysgwyr. Byddwn yn cydnabod yr anghenraid am drefniadau sy’n ymatebol i wahanol rannau o’r sector a byddwn yn adeiladu ar berthnasoedd â phartneriaid – yng Nghymru a’r tu allan i Gymru – sy’n rhan o asesu’r sefydliadau a reoleiddir gennym i ysgogi goruchwyliaeth gydlynol ar ansawdd.

Byddwn yn ymgynghori â darparwyr ar ddangosyddion perfformiad perthnasol, sy’n deillio o safonau sylfaenol, i hybu gwelliant parhaus, gan gydnabod amrywiaeth ein dysgwyr a’r ddarpariaeth, blaenoriaethu safonau deilliannau dysgwyr, a gweithredu’n gyflym lle nad yw safonau’n cael eu cyrraedd.

Ymrwymiadau twf

Byddwn yn hybu dealltwriaeth eglur am yr hyn y mae safonau rhagorol o ran deilliannau dysgwyr a darpariaeth o ansawdd da’n ei olygu ym mhob rhan o’r sector addysg drydyddol. Byddwn yn pennu targedau uchelgeisiol ar gyfer deilliannau a phrofiadau dysgwyr, gan gydnabod y bydd mesuriadau o lwyddiant a dangosyddion perfformiad yn amrywio gydag amgylchiadau dysgwyr ac mewn gwahanol rannau o’r sector.

Byddwn yn adolygu sut y gall modelau cyllido a chofrestru ddylanwadu ar gyflawni dangosyddion perfformiad, gan ganolbwyntio ar gyfrifoldeb pob darparwr i bennu a gwireddu eu huchelgeisiau eu hunain ar gyfer gwella’n barhaus. Byddwn yn sefydlu ffyrdd o fonitro, rheoli a gwella perfformiad y sector addysg drydyddol, gan ymyrryd fel y bo angen lle mae perfformiad islaw’r safonau trothwy a chan ddefnyddio ein pwerau cynnull a dylanwadu i hybu arloesi a gwelliant.

Byddwn yn dadansoddi deilliannau dysgwyr i sicrhau bod dysgu wedi cael effaith gadarnhaol ar ddyfodol dysgwyr, yr economi a chymdeithas a’i fod yn ein galluogi i ddeall pa mor dda y mae’r sector addysg drydyddol yn cynorthwyo Cymru i symud ymlaen gyda’r amcanion y mae’n dymuno’u cyflawni, gan fabwysiadu ymyriadau cymesur lle mae tystiolaeth yn dangos nad felly y mae hi.

Tyfu ymchwil o fri rhyngwladol a rhoi ysbrydoliaeth i arloesi drwyddi draw yn y sector addysg drydyddol.

Mae ymchwil ac arloesi’n gwneud cyfraniadau hanfodol at economi a chymdeithas Cymru. Mae ein systemau ymchwil ac arloesi’n gryf, ond rydym yn uchelgeisiol, ac mae arnom eisiau tyfu maint a rhagoriaeth y sylfaen ymchwil yng Nghymru, gan gydnabod ein cyfle fel un endid trydyddol i ategu ffocws ymchwil ac arloesi â datblygiad darpariaeth addysg a hyfforddiant..

Bydd cydweithio o fewn y sector addysg drydyddol, gyda chyflogwyr, y cyhoedd a’r trydydd sector a chymunedau, yn ogystal â chydweithio rhyngwladol, yn hybu ein huchelgeisiau i sicrhau y manteisir yn llawn ar effaith ein gweithgarwch ymchwil ac arloesi. Rydym yn cydnabod y cyfleoedd ar gyfer dull mwy systematig o hybu’r llwybrau lluosog rhwng ymchwil, yr economi a chymdeithas. Byddwn yn cefnogi meysydd lle ceir cryfder ac arbenigedd unigryw i adeiladu ymhellach arnynt mewn cymunedau, rhanbarthau, yn genedlaethol ac yn rhyngwladol.

Mae arnom eisiau i Gymru ddod yn adnabyddus am fod yn lle gwych i wneud ymchwil, am fod yn barod i dderbyn perthnasoedd newydd, a bod yn wlad sy’n uchel ei bri am ymchwil sy’n dwyn budd economaidd, diwylliannol a chymdeithasol cynaliadwy. Byddwn yn hybu cyfranogiad Cymreig mewn rhaglenni ymchwil cenedlaethol, Ewropeaidd a rhyngwladol.

Ymrwymiadau sefydlu

Byddwn yn hybu amgylcheddau ymchwil sy’n darparu diwylliant sy’n ategu uniondeb, amrywiaeth, cynwysoldeb, llesiant a pharch, gan ddenu a chadw’r ymchwilwyr gorau o bob rhan o’r byd, a chefnogi sylfaen ymchwil fwy amrywiol a chynhwysol.

Byddwn yn cydweithio’n agos gyda chyrff perthnasol sy’n gyfrifol am ymchwil ac arloesi ledled y DU, ac yn cynorthwyo ein darparwyr i gael mantais gystadleuol, i sicrhau cyfran fwy o gyllid sydd ar gael o ffynonellau cyhoeddus a phreifat, yn genedlaethol ac yn rhyngwladol, i dyfu’r sylfaen ymchwil yng Nghymru.

Byddwn yn adnabod sut y gallwn ddefnyddio data i fesur a dangos effaith y gwaith ymchwil ac arloesi a gyllidir gennym, ac yn adolygu sut yr ydym yn rhannu ein gwybodaeth a’n dysgu mewn cymunedau.

Ymrwymiadau twf

Byddwn yn hybu gweithgareddau ymchwil ac arloesi sydd â photensial i gael effaith gadarnhaol ar fywyd economaidd, cymdeithasol a diwylliannol Cymru, sy’n cynyddu i’r eithaf y cyfleoedd ar gyfer cydweithio sy’n canolbwyntio ar gryfderau ein sylfaen ymchwil, ac sy’n dangos dylanwad byd-eang.

Byddwn yn hybu diwylliant o arloesi a chyfnewid gwybodaeth drwyddi draw yn y sector addysg drydyddol, a byddwn yn hybu cydweithio gyda busnesau, buddsoddwyr ym myd diwydiant a’r Llywodraeth, i gyfrannu at wella cynhyrchiant yn ein heconomi a chyfrannu’n well at ddarparu cyflenwad cynaliadwy o sgiliau.

Byddwn yn gweithio gyda darparwyr i hybu cyfleoedd ar gyfer busnesau newydd, gan gynnwys cwmnïau deilliedig a mentrau cymdeithasol sy’n cael eu sefydlu, eu cynnal a’u tyfu yng Nghymru o ganlyniad i wybodaeth a gynhyrchwyd yng Nghymru.

Hybu mwy o ddefnydd o’r Gymraeg, a chynyddu’r galw am, a chyfranogiad mewn, dysgu ac asesu trwy gyfrwng y Gymraeg.

Mae gan Medr rôl sylweddol o ran cyfrannu at uchelgais Llywodraeth Cymru i greu miliwn o siaradwyr Cymraeg erbyn 2050. Mae dyletswydd arnom i ysgogi’r galw am ddysgu, a hybu cyfranogiad mewn dysgu trwy gyfrwng y Gymraeg ac i sicrhau digon o ddarpariaeth yn Gymraeg i ateb y galw.

Ein gweledigaeth yw llywio system addysg drydyddol sy’n cefnogi dysgu ar bob adeg mewn bywyd ar gyfer y Gymraeg ac un lle mae’r Gymraeg yn dod yn rhan annatod o’r patrwm o ddysgu gydol oes yng Nghymru. Byddwn yn cynllunio’n strategol, mewn partneriaeth gyda’r Coleg Cymraeg Cenedlaethol fel ein person dynodedig o fewn y Ddeddf, i gynyddu a gwella’r ddarpariaeth o ran addysg ac asesu cyfrwng Cymraeg a’r modd y’u hyrwyddir.

Byddwn yn cofleidio ein rôl o fewn Bil y Gymraeg ac Addysg (Cymru). Byddwn yn gweithio gyda phartneriaid, gan gynnwys awdurdodau lleol, i ddatblygu a chyflawni Cynlluniau Iaith Gymraeg, a byddwn yn gweithio gyda darparwyr i gynnig llwybrau di-dor ar gyfer dysgwyr ar draws y sector trydyddol.

Ymrwymiadau sefydlu

Byddwn yn datblygu Strategaeth ar gyfer y Gymraeg i sicrhau bod Medr yn weithle dwyieithog lle gall staff, partneriaid a rhanddeiliaid ddefnyddio’u Cymraeg yn naturiol.

Byddwn yn gweithio gyda’r Coleg Cymraeg Cenedlaethol, Cymwysterau Cymru a rhanddeiliaid eraill i ddatblygu cynllun cenedlaethol ar gyfer y Gymraeg ar draws y sector addysg drydyddol yn ei gyfanrwydd, gan alluogi llwybrau di-dor ar gyfer dysgu yn Gymraeg.

Ymrwymiadau twf

Byddwn yn monitro cynnydd o ran cyflawni ein strategaeth genedlaethol dros oes ein Cynllun Strategol, gan gydweithio i asesu cynnydd a gweithredu lle mae angen cefnogi cynnydd.

Ar y cyd â phartneriaid, byddwn yn hybu manteision dysgu Cymraeg er mwyn i fwy o bobl gael eu hannog i gofleidio’r Gymraeg ac i ddatblygu eu sgiliau Cymraeg trwy gydol eu bywydau.

Byddwn yn gweithio gyda’r Coleg Cymraeg Cenedlaethol i ddylunio polisïau sy’n hybu ethos a diwylliant Cymraeg yn y sector addysg drydyddol, sy’n ehangu’r gyfran o’r gweithlu sy’n gallu addysgu trwy gyfrwng y Gymraeg, ac sy’n annog y gweithlu addysg drydyddol ehangach i ddatblygu eu sgiliau Cymraeg.