Medr yn ymateb i’r cyngor cyntaf ynghylch ei ddyletswyddau o ran y Gymraeg

Heddiw mae Medr wedi croesawu ei gyngor cyntaf gan y Coleg Cymraeg Cenedlaethol ynghylch ei ddyletswyddau o ran y Gymraeg, gan adlewyrchu ein huchelgeisiau cyffredin i annog y galw am addysg drydyddol wedi’i darparu drwy gyfrwng y Gymraeg, a chyfranogiad yn hynny.  

Cyhoeddwyd y cyngor gan y Coleg, yn dilyn dynodiad y Coleg i gynghori Medr, ynghylch ei ddyletswydd i hyrwyddo addysg drydyddol drwy gyfrwng y Gymraeg, ac mae’r Bwrdd wedi rhoi ystyriaeth fanwl iddo.

Mae cyngor y Coleg yn nodi’r camau y dylai Medr a’r sector addysg drydyddol eu cymryd i gefnogi uchelgeisiau Llywodraeth Cymru ar gyfer y Gymraeg a nodau Cymraeg 2050. Mae hyn yn cynnwys argymhelliad canolog y dylai Medr ddatblygu Cynllun Cenedlaethol ar gyfer y Gymraeg ar draws y sector addysg drydyddol, y mae Bwrdd Medr wedi cytuno arno.

Bydd Cynllun Strategol Medr yn cael ei gyflwyno i weinidogion Cymru ym mis Rhagfyr 2024. Mae cyngor y Coleg, ynghyd â gwaith ymgysylltu ar draws y sector addysg drydyddol, wedi chwarae rhan hollbwysig wrth siapio’r ffordd y bydd Medr yn ymateb i’w ddyletswyddau strategol o ran y Gymraeg.

Yn ôl Simon Pirotte OBE, Prif Weithredwr Medr: “Mae’r berthynas â’r Coleg Cymraeg Cenedlaethol yn hollbwysig i Medr. Rydym yn unedig yn ein dyhead i weld y Gymraeg yn ffynnu yng Nghymru, ac wedi ymrwymo i sicrhau bod y sector addysg drydyddol yn chwarae ei ran i wireddu gweledigaeth am filiwn o siaradwyr yng Nghymru erbyn 2050. Mae’r cyngor a gawsom yn nodi dechrau cyfnod newydd pwysig o gydweithio, gan adeiladu ar y seiliau cadarnhaol a osodwyd gennym eisoes. Bydd Cynllun Cenedlaethol yn sbardun hanfodol i alluogi mwy o ddysgwyr i feithrin, cynnal a defnyddio’u sgiliau Cymraeg.”

Bydd Medr yn parhau i roi ystyriaeth lawn i gyngor y Coleg wrth weithredu ei Gynllun Strategol 2025-2030 mewn partneriaeth â’r holl randdeiliaid.