Ar gyfer dysgwyr

Cynnwys dysgwyr 

Ein nod yw helpu darparwyr addysg drydyddol i roi’r profiad gorau bosib i ddysgwyr.

Cod Ymgysylltu â Dysgwyr

Bydd Medr yn datblygu Cod Ymgysylltu â Dysgwyr, gyda’r bwriad o sicrhau bod buddiannau dysgwyr yn cael eu cynrychioli, eu bod yn cael y cyfle i fynegi barn wrth ddarparwyr am yr addysg a’r hyfforddiant y maent yn ei dderbyn, a’u bod yn gallu cymryd rhan mewn penderfyniadau.

Bydd yn ofynnol i ddarparwyr cofrestredig, a’r rhai a gyllidir gan Medr, gydymffurfio â’r Cod Ymgysylltu â Dysgwyr, ynghyd â’r chweched dosbarth mewn ysgolion a gynhelir gan yr awdurdod lleol.

Mae’r Rhestr chwarae Ymgysylltu â Dysgwyr ar Hwb yn cyflwyno drafft cychwynnol o’r weledigaeth a’r egwyddorion ar gyfer y Cod Ymgysylltu â Dysgwyr, a luniwyd ar y cyd â’r dysgwyr. Ceir esboniad hefyd o’r cefndir o ran sut y cawsant eu datblygu. Bydd hyn yn sail i ddatblygu’r Cod.

Partneriaeth â’r Myfyriwr / Dysgwr 

Roedd Y Bartneriaeth â Myfyrwyr mewn Sefydliadau Addysg Bellach ac Addysg Uwch yng Nghymru yn amlygu nifer o agweddau ar arfer da, fel integreiddio’r bartneriaeth â myfyrwyr i benderfyniadau strategol ac ymwreiddio dulliau manylach o gasglu safbwyntiau myfyrwyr.

Mae llais y myfyriwr/dysgwr yn llywio gwaith cyrff llywodraethu ar draws yr holl sefydliadau sy’n darparu addysg uwch a phellach ac yn helpu i sicrhau bod y penderfyniadau a wneir gan gyrff llywodraethu yn ystyried anghenion y corff amrywiol o fyfyrwyr.

Mae myfyrwyr-lywodraethwyr yn gwneud cyfraniad arbennig i brifysgolion a cholegau bob blwyddyn, ac yn cyflwyno cyd-destun a phersbectif hynod werthfawr i’w sefydliadau ac i’r ffordd y cânt eu cynnal. Mae’r Canllaw i fyfyrwyr sy’n llywodraethwyr yng Nghymru, a luniwyd gan AU Ymlaen wedi’i anelu at fyfyrwyr-lywodraethwyr i’w cefnogi yn eu rôl.

Mae’r blaenoriaethau strategol ar gyfer Medr, fel y’u nodwyd gan Lywodraeth Cymru, yn cynnwys rhoi’r dysgwr wrth galon y system, drwy ganolbwyntio ar brofiadau a llesiant dysgwyr mewn addysg drydyddol. Bydd Medr yn bwrw ymlaen â hyn yn ei gynllun strategol, a fydd yn cynnwys ei waith ar fframwaith ansawdd ar gyfer addysg drydyddol a hyfforddiant, a’r cod ymgysylltu â dysgwyr.

Mae ymgysylltu â myfyrwyr yn rhan allweddol o adolygiadau ansawdd allanol ar gyfer darparwyr addysg uwch, ac mae’r elfen honno wedi’i chynnwys yn rhan o arolygiadau Estyn ar gyfer yr holl sectorau trydyddol eraill.

Gwybodaeth i fyfyrwyr addysg uwch

Siarteri Myfyrwyr

Dylai sefydliadau addysg uwch weithio gyda’r corff o fyfyrwyr i baratoi Siarteri Myfyrwyr (cylchlythyr CCAUC W22/20HE) sy’n nodi disgwyliadau, hawliau a chyfrifoldebau sefydliadau a’u myfyrwyr y naill i’r llall. Dylai’r rheiny fod wedi’u cynllunio i gefnogi profiad dysgu’r myfyriwr, gan gynnwys dolenni priodol i wybodaeth bellach. Cyhoeddodd Cyngor Cyllido Addysg Uwch Cymru (CCAUC) ganllawiau ar sut y dylai darparwyr addysg uwch fynd ati i ddatblygu siarteri myfyrwyr ac mae’r disgwyliadau hyn wedi’u cynnwys yn Fframwaith Asesu Ansawdd Cymru.

Ariannu undebau myfyrwyr effeithiol

Cyhoeddodd CCAUC gyfarwyddyd (cylchlythyr CCAUC W14/06HE) ar arfer da mewn cyllido undebau myfyrwyr effeithiol a democrataidd, a chynrychiolaeth myfyrwyr ar gyfer ymgynghoriad.

Arolwg Cenedlaethol o Fyfyrwyr

Mae gan ddarpar fyfyrwyr fynediad at wybodaeth gyhoeddus, sy’n cynnwys canlyniadau’r Arolwg Cenedlaethol o Fyfyrwyr (NSS), y wefan Darganfod Prifysgol a Setiau Gwybodaeth Allweddol (KIS). Setiau Gwybodaeth Allweddol (KIS). Amlinellir yr wybodaeth y dylid ei darparu i fyfyrwyr ac i ddarpar fyfyrwyr gan yr Awdurdod Cystadleuaeth a Marchnadoedd.

Mae’r Arolwg Cenedlaethol o Fyfyrwyr (NSS) yn casglu adborth ar fodlonrwydd myfyrwyr israddedig â’u cwrs. Mae data’r NSS ar gael ar wefan Office for Students (OfS). Mae canlyniadau manylach o’r NSS ar gael i sefydliadau ac undebau myfyrwyr i ddibenion mewnol. Mae Medr yn bwriadu gwneud gwaith i gasglu safbwyntiau dysgwyr mewn rhannau eraill o addysg drydyddol.

Myfyrwyr Ôl-radd

Mae ymchwil wedi’i chyhoeddi sy’n nodi anghenion gwybodaeth penodol ar gyfer myfyrwyr ôl-radd a addysgir, gan gynnwys argymhellion i sefydliadau addysg uwch wella’r wybodaeth ar gyfer cynulleidfa amrywiol o ddarpar fyfyrwyr ôl-radd.

Yn 2022, cyhoeddodd CCAUC adroddiad gan AU Ymlaen, a gomisiynwyd gan CCAUC, ar adolygu polisi ac arfer yn gysylltiedig â chefnogi myfyrwyr ôl-radd sy’n addysgu.

Yn 2023, cyhoeddodd CCAUC adroddiad gan Ymchwil Arad, a luniwyd ar ran CCAUC, ar brofiad ehangach myfyrwyr ymchwil ôl-radd.